СОЗМОНҲОИ ҶАҲОНӢ ВА РУШДИ СОҲИБКОРӢ ДАР ДЕҲОТ

   Хоруғ, 10 феврал. (АМИТ «Ховар», Л.Додо).– Дар шаҳри Хоруғ намоиши маҳсулоти соҳибкорони деҳаҳои навоҳии Рӯшон ва Шуғнон баргузор гардид, ки сарпарасти он Бунёди Оғохон мебошад.  Тавре Гулноз Ҷумъаева сармутасаддии рушди иқтисоди деҳот тавассути барномаи ҷонибдории инкишофи иҷтимоии манотиқи кӯҳистони Бунёди Оғохон иттилоъ дод, соли 2010 дар деҳот 22 барнома барои ҷалб намудани соҳибкорони нав амалӣ гардонида шуд. Ба гуфти Гулноз Ҷумъаева ин барномаҳо асосан барои анҷом додани корҳои ҷӯроббофӣ, тоқидӯзӣ, хушк кардани туту дар қуттиҳои махсус ҷой додани он, асалпарварӣ, коркарди меваю сабзавот нигаронида шуда буданд. Ба хотири амалӣ гардидани ҳар як барнома аз тарафи Бунёди Оғохон на кам аз 3000 доллар маблағ ҷудо мешавад. Ҳамин тавр, дар намоиш кулли маҳсулоти соҳибкорон ба фурӯш рафт.    Ба маҳсулоти соҳибкорон асосан хориҷиён таваҷҷўҳи хосса доранд. Онҳо тоқию ҷўробҳоро асосан чун тўҳфа барои пайвандонашон мехаранд. Имрўз дар 22 барнома беш аз 500 нафар занони деҳот фаро гирифта шудаанд. Мақсад аз амалӣ гардонидани ин барномаҳо пайдо намудани соҳибкорони нав аст.    Гулноз Ҷумъаева дар мавриди нақшаҳои оянда гуфт, ки имсол миқдори чунин барномаҳо 2-3 баробар афзуда, теъдоди соҳибкорони деҳот низ зиёд мешавад.