ТАҶДИДИ ХАТҲОИ ИНТИҚОЛИ НЕРӮИ БАРҚ

  Душанбе, 11 феврал. (АМИТ «Ховар», Дилшодаи Ҷонмард).-Имрӯз дар ҳузури Сарвазири мамлакат Оқил Оқилов машварати корӣ баргузор гардид, ки дар он масоили бунёд ва таҷдиди хатҳои маҳаллии интиқоли нерӯи барқ мавриди баррасӣ қарор гирифт.  Таъкид гардид, ки сохтмон, таҷдид ва азнавсозии хатҳои интиқоли нерӯи барқ дар ҷумҳурӣ яке аз омилҳои асосии раҳоӣ аз бунбасти энергетикӣ маҳсуб гардида, дар давоми чанд соли охир дар Тоҷикистон бо бунёди хатҳои нави интиқоли нерӯи барқ ва тармиму таҷдиди хатҳои мавҷуда вазъи таъминоти нерӯи барқ сифатан беҳтар гардидааст.   Оқил Оқилов ба роҳбарони вазорату идораҳои мамлакат ва дигар шахсони масъули соҳа дастур дод, ки барои татбиқи лоиҳаҳои ба нақша гирифташудаи сохтмони хатҳои интиқоли нерӯи барқ тадбирҳои бетаъхир андешида ҷиҳати ҷалби сармояи хориҷӣ ва дарёфти дигар манбаъҳои маблағгузории лоиҳаҳои мазкур ҳамкориро бо бонкҳо ва ташкилоту созмонҳои байналмиллалӣ дар сатҳи зарурӣ ба роҳ монанд.