ТАҶЛИЛИ 70 – СОЛАГИИ ҶӮРАБЕК НАБИЕВ

    Душанбе, 15 феврал. (АМИТ «Ховар», Бекназари Абӯбакр). — Моҳи апрели соли равон дар шаҳри Хуҷанд 70-солагии ҳунарманди мардумии Тоҷикистон Ҷӯрабек Набиев таҷлил карда мешавад. Дар ин бора раиси вилояти Суғд Қоҳир Расулзода қарори махсус имзо кард.     Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ин тадбир бо мақсади тарғибу ташвиқи санъати классикии тоҷик, дар рӯҳияи худшиносию худогоҳӣ тарбия намудани насли наврас, бо назардошти нақш ва мавқеи дар рушди санъати тоҷик доштаи ҳунарманди маъруф роҳандозӣ шудааст.    Ёдовар мешавем, ки шӯъбаи рушди иҷтимоӣ ва робита бо ҷомеаи дастгоҳи раиси вилоят, раёсати фарҳанги вилоят якҷоя бо мақомоти иҷроияи ҳокимияти давлатии шаҳри Хуҷанд оид ба нақш ва мақоми Ҷӯрабек Набиев дар рушди санъати овозхонӣ силсилаи чорабиниҳоро доир менамоянд.