ТАЪМИНИ ИТТИЛООТИ ЭКОЛОГӢ ДАР КИШВАР

     Душанбе, 17 феврал.(АМИТ «Ховар», Марзия Саидова). – «Ташкил ва пешбурди мониторинги экологӣ ҳамчун базаи асосии таъмини иттилооти кишвар аҳамияти муҳим дорад», гуфт зимни баррасии лоиҳаи Қонуни Ҷумҳурии Тоҷикистон «Дар бораи мониторинги экологӣ» раиси Кумитаи ҳифзи муҳити зисти назди Ҳукумати Ҷумҳурии Тоҷикистон Талбак Салимов.     Хабарнигори АМИТ «Ховар» иттилоъ медиҳад, ки лоиҳаи қонуни мазкур дар ҷаласаи навбатии иҷлосияи дуюми Маҷлиси намояндагон қабул гардид. Зикр шуд, ки зарурати таҳия ва пешниҳоди лоиҳаи ин қонун ба парлумони мамлакат таъмини талаботи давлат, ҳукумат ва шаҳрвандони Ҷумҳурии Тоҷикистон ба иттилооти мукаммал ва эътимоднок доир ба вазъи муҳити зисту тағйирёбии он, пешгирӣ ва рафъи оқибатҳои ногувори ҳодисаҳои табиӣ ва таъсири антропогенӣ мебошад.    Мавриди зикр аст, ки мониторинги экологӣ ҳангоми таҳия ва амалӣ намудани барномаҳои рушди иқтисодӣ ва иҷтимоӣ, таъмини амнияти экологии иттилооти кишвар яке аз нишондиҳандаҳои асосӣ ба шумор меравад.