ВАРЗИШГОҲҲОИ ФАЙЗОБОД МЕАФЗОЯНД

  Файзобод,   7 феврал. (АМИТ «Ховар», Зебо  Давлатова). – Мудири  маорифи   ноҳияи  Файзобод  Маҳмадулло Аминов ба  хабарнигори  АМИТ «Ховар» иттилоъ  дод, ки   чанде  пеш  дастаи  яккачини паҳлавонони  навраси  ноҳия  аз  мусобиқаи  созмондодаи  Маркази  инкишофи  гӯштини  дзюдои  ноҳияи  Шоҳмансури  пойтахт  баргаштанд.  Бояд  гуфт, ки  онҳо  бо  13  медал,  аз  ҷумла  ду  медали  тилло  сарфароз  гардиданд.    Мудири  маориф   афзуд, ки  дар  оғози  соли  нав  шогирди  мактаби  таҳсилоти умумии  рақами 2  Аҳмадшоҳ  Раҳматзода   дар  ҳайати  дастаи  яккачини  навоҳии  тобеи  марказ  дар  мусобиқаи  ҷумҳуриявии  дзюдочиёни  наврас  сазовори  ҷои  сеюм  ва  медали  биринҷӣ  гардид.    Раиси  ноҳия  Абдулло  Ҳакимов  аз  дастовардҳои  варзишгарони  ноҳия  изҳори  қаноатмандӣ  намуда,  барои  сохтмони  варзишгоҳҳо  дар  ҳар  ҷамоату  деҳот ба  масъулин  дастур  дод.