ВУРУДИ ТАҶҲИЗОТИ НАВИ ИСТЕҲСОЛИ ПАХТА

Душанбе, 1 феврал. (АМИТ «Ховар», Кристина Эрлих). – Дар Тоҷикистон истеҳсоли пахта бо истифодаи таҷҳизоти муосир, ки аз ҷониби мутахассисони хитоӣ пешниҳод шудаанд, дар назар аст. Дар ин бора ба хабарнигори АМИТ «Ховар» аз Вазорати  кишоварзии ҷумҳурӣ  доданд. Тибқи иттилои манбаъ  барои дар истеҳсолот ҷорӣ намудани таҷҳизоти нав, алалхусус низоми обдиҳии қатравӣ бо маблағгузорони хитоӣ ҳуҷҷати зарурӣ ба имзо расид ва дар назар аст, ки обдиҳии қатравӣ дар 50 гектар майдони ноҳияи Бохтари ҷумҳурӣ амалӣ мегардад. Зикр кардан бамаврид аст, ки мутахассисони хитоӣ ният доранд  дар ҳазор гектар майдони   ноҳияҳои Қумсангир ва Ҷомии вилояти Хатлон биринҷ парвариш намоянд. «Ғайр аз ин мутахассисони давлати Ҳиндустон хоҳиш доранд  дар 4 гектар замини ноҳияи Ёвон маҳсулоти кишоварзӣ, аз ҷумла гандум ва биринҷ парвариш намоянд», — хабар доданд аз Вазорати кишоварзӣ. Аз Вазорати кишоварзӣ ҳамчунин иттилоъ доданд, ки онҳо тайёранд қитъаҳои замини дархостшударо ба мутахассисон пешниҳод намоянд.