АДИБОНИ СУҒД «МАОРИФ — ОЯНДАИ ТОҶИКИСТОН» МЕХОҲАНД

   Душанбе, 17 март. (АМИТ «Ховар», Бекназари Абӯбакр). — Бо мақсади дастрас намудани китоби «Маориф — ояндаи Тоҷикистон» дар асоси дархости раиси шӯъбаи суғдии Иттифоқи нависандагони  Тоҷикистон қарори раиси вилояти Суғд Қоҳир Расулзода ба тасвиб расид.     Ба Сарраёсати молияи вилоят супориш шуд, ки аз ҳисоби маблағҳои бақияи озоди буҷети вилоятӣ ба ҳисоби шӯъбаи суғдии Иттифоқи нависандагони Тоҷикистон 26 127 сомонӣ ирсол намояд. Қарори мазкур барои тасдиқ ба иҷлосияи навбатии Маҷлиси вакилони халқи вилоят пешниҳод   мешавад.    Тибқи қарори дигари раиси вилоят бо мақсади қадршиносӣ аз ҷасорату мардонагии иштирокчиён ва посдории хотираи қурбониёни бартарафкунии садама дар Нерӯгоҳи барқи атомии Чернобил, ба муносибати 25 — солагии бартарафсозии садамаи ин нерӯгоҳ санаи 26 апрели соли 2011 дар қаламрави вилояти Суғд рӯзи ёдбуд гузаронида мешавад.    Ба раисони шаҳру ноҳияҳои вилоят супориш дода шуд, ки барои хизматрасонии тиббӣ, ҳифзи иҷтимоӣ, пардохт намудани ҷубронпулии ҳарсолаи маъюбон ва дастгирии моддии  бартарафкунандагони садамаи Нерӯгоҳи барқи атомии Чернобил ва посдории хотираи онҳое, ки бо сабаби заҳролудшавӣ ҳангоми рафъи оқибатҳои садама ҷони худро нисор кардаанд, тадбирҳои мушаххас андешанд.