АВВАЛИН ТАҶРИБАИ ШИМОЛ ДАР ҶАНУБ

  Душанбе, 1 март. (АМИТ «Ховар», Бекназари Абӯбакр). — Кооперативи истеҳсолии «Қалъаи Пучқоқ»  аз хоҷагиҳои пешсафи соҳаи кишоварзӣ дар ноҳияи Фархори вилояти Хатлон маҳсуб ёфта, фаъолияти худро дар самти пахтакорӣ, боғдорӣ ва истеҳсоли сабзавот ба роҳ мондааст. Меҳнаткашони хоҷагии мазкур соли ҷорӣ дар майдони 8,5 га боғи нави зардолу, шафтолу, бодом, чормағз ва анор бунёд намуданд. Ниҳолҳои навъи беҳтарин аз ноҳияи Исфара, шаҳри Қурғонтеппа ва хоҷагии ниҳолпарварии «Навниҳол» дастрас гардиданд.             Бояд гуфт, ки роҳбари хоҷагии мазкур Н.Валиев соли гузашта аз ҷониби Вазорати кишоварзии мамлакат бо унвони «Боғдори беҳтарин» сазовор дониста шуд. Ӯ аввалин шуда дар қисмати ҷануби кишвар таҷрибаи хушк намудани зардолу ва дигар меваҳоро бо усули пешқадам ба роҳ монд.              Ёдовар мешавем, ки баробари бунёди  боғи нав зиёда аз 30 нафар аҳолии ноҳия  бо ҷойи кор ва маоши мувофиқ таъмин гардиданд.