ОҒОЗИ ФОРУМ ДАР МАСКАВ

Душанбе, 17 март. (АМИТ «Ховар», Пайрав Назаров). — 18 март дар шаҳри  Маскав форуми байналмилалии иқтисодии кишварҳои узви ИДМ таҳти унвони «20 сол дар якҷоягӣ: таҷрибаи ҳамкориҳо ва дурнамо» ба кори худ шурӯъ менамояд.  Форумро раиси Кумитаи иҷроия-котиби иҷроияи ИДМ Сергей Лебедев бо сухани ифтитоҳӣ оғоз намуда, сипас дар ҷаласаи нақшавии форум муовини аввали раиси Ҳукумати Федератсияи Русия, ҳамраиси Шӯрои иқтисодии ИДМ И.И. Шувалов бо маърӯза баромад менамояд. Дар назар аст, ки дар форуми мазкур ба ғайр аз ҷаласаи нақшавӣ, ҳамчунин, панҷ зерҷаласаи махсус гузаронида  шавад. Ҳамчунин, дар доираи форуми мазкур баргузории барномаи мубоҳисавӣ ва маросими тӯҳфасупорӣ ба пешвоҳои тиҷорати кишварҳои узви ИДМ дар назар аст.  Интизор меравад,  ки аз рӯи натиҷаҳои ҷаласаи нақшавӣ ва кори зергурӯҳҳо   иштирокчиёни форум қарор қабул менамоянд.  Ёдовар мешавем, ки барои иштирок дар кори форум намояндагони баландпояи мақомоти давлатӣ, доираҳои расмӣ-тиҷоратӣ, олимон, сиёсатмадорон, иқтисоддонҳо аз давлатҳои иштирокчии ИДМ ва коршиносони Шӯрои Аврупоӣ даъват шудаанд. Иттилои мазкур ба хабарнигори АМИТ «Ховар» аз маркази матбуоти Кумитаи иҷроияи ИДМ дастрас гардид.