ОШКОРНАМОИИ 66,6 ФОИЗИ ҶИНОЯТҲО ДАР ДУ МОҲ

Душанбе, 17 март. (АМИТ «Ховар», Лаззат Диловарзод). — Тибқи маълумоти идораҳои қудратӣ ва ҳифзи ҳуқуқи  кишвар, ки ба Агентии омори назди Президенти ҷумҳурӣ пешниҳод шудааст, дар моҳҳои январ —  феврали соли 2011 2 ҳазору 960 ҷиноят ба қайд гирифта шуд, ки аз он 2568 ҷиноят аз ҷониби ВКД ҶТ ба қайд гирифта шуд, ки  баробари 86,8 фоизи шумораи умумии ҷиноятҳои ба қайд гирифташуда мебошад. Мақомоти дигари ҳифзи ҳуқуқ дар ин муддат 392 ҷиноят ё 13, 2 фоизи умумии ҷиноятҳоро ба  қайд гирифтаанд.    Бино ба иттилои ҳамин манбаъ, дар ду моҳи аввали соли 2011 966 ҷинояти вазнин ба қайд гирифта шуд, ки нисбат ба ҳамин давраи соли 2010 2,5 баробар зиёд аст.     Ба қайдгирии ҳодисаҳои дуздӣ 4,8 фоиз, ҳуҷуми роҳзанона 2,2 баробар ва қаллобӣ 5,1 баробар зиёд шудааст.    Ҷиноятҳои вобаста ба тайёр кардан, истеъмол, фурӯш ва нигоҳ доштани  маводи нашъадор 23, 4 фоиз, ҷиноятҳои иқтисодӣ 3, 5 баробар зиёд шудаанд.    Ошкоркунии умумии ҷиноятҳо дар моҳҳои январ – феврали соли ҷорӣ 66, 6 фоизро ташкил кард, ки  нисбат ба ҳамин давраи  соли 2010 5,1 фоиз камтар аст.