ТАРАДДУДИ ВАЗИРОН БА МУҲОКИМАИ ОШКОРО

 Душанбе, 16 март. (АМИТ «Ховар», Марзия Саидова). — 18 марти соли 2011 дар Душанбе муҳокимаи ошкорои парлумонӣ баргузор мегардад. Дар ин хусус, 16 март дар ҷараёни иҷлосияи дуюми палатаи поёнии парлумони мамлакат, ки таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров баргузор шуд, қарор қабул гардид. Муҳокимаи ошкорои парлумонӣ дар мавриди иҷрои Буҷети давлатии Ҷумҳурии Тоҷикистон  дар Вазорати нақлиёти Ҷумҳурии Тоҷикистон ва Хадамоти алоқаи назди Ҳукумати Ҷумҳурии Тоҷикистон барои солҳои 2010-2011 ҷиҳати татбиқи стратегияи паст кардани сатҳи камбизоатӣ  дар кишвар вобаста ба раҳо намудани ҷумҳурӣ аз  бунбасти коммуникатсионӣ гузаронида мешавад.                Амир Катаев, раиси Кумитаи Маҷлиси намояндагон зимни шарҳи масъалаи мазкур гуфт, ки  баромадан аз бунбасти коммуникатсионӣ яке аз ҳадафҳои стратегии Ҳукумати Ҷумҳурии Тоҷикистон буда, он ҳамасола зимни Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон матраҳ мегардад.