ТАСВИБИ БОЗ ЯК СОЗИШНОМА ДАР БАХШИ ҲАМЛУ НАҚЛ

 Душанбе, 16 март. (АМИТ «Ховар», Марзия Саидова). — Палатаи поёнии парлумони Тоҷикистон 16 марти соли 2011 дар иҷлосияи дуюм Созишнома оид ба интиқоли  байнисарҳадии одамон, воситаҳои нақлиёт ва  молҳо дар доираи  ҳамкории иқтисодии минтақавии Осиёи Марказиро ба  тасвиб расонид.  Низом Ҳакимов,  вазири нақлиёти Тоҷикистон зимни тавзеҳи санади мазкур гуфт: Созишнома, ки ҳадафаш рушди  бахшҳои иқтисодию иҷтимоӣ тавассути  системаи нақлиётию коммуникатсионӣ мебошад, соли 2010 дар Душанбе байни Ҳукумати Ҷумҳурии Тоҷикистон  ва Ҳукумати  Қирғизистон ба имзо расидааст.  Мақсади Созишнома  ҳифзи манфиатҳои иқтисодии кишварҳо буда, он ба беҳтар намудани сатҳи хизматрасонӣ зимни интиқоли байнисарҳадии шахсон, воситаҳои нақлиёт ва молҳо, муҳайё сохтани ҷойҳои нави корӣ, рушди соҳибкорӣ, ташкили бозорҳои наздисарҳадӣ, афзоиши шумораи сайёҳон, баланд бардоштани сатҳи хизматрасонӣ дар бахши гумрукӣ ва соддагардонидани амалиёти гумрукӣ мусоидат менамояд.   Раиси Маҷлиси намояндагони Ҷумҳурии Тоҷикистон Шукурҷон Зуҳуров санади мазкурро муҳим арзёбӣ карда  гуфт, ки агар Ҷумҳурии Тоҷикистон бо дигар кишварҳои минтақа чунин Созишномаро ба имзо мерасонид, ин дар пешрафт ва устувор гардонидани иқтисодиёти кишвар ва беҳдошти сатҳи рӯзгори аҳолӣ мусоидат менамуд.