ТАВАҶҶӮҲИ ХОСАИ САРВАРИ ДАВЛАТ БА СОҲАИ МАОРИФ

Душанбе, 25 март. (АМИТ «Ховар», Дилшодаи Хайруллоҳ). — Дар деҳаи Ҷавонии ҷамоати Палдораки  ноҳияи  Мастчоҳ   мактаби замонавӣ иборат аз 8 синфхона ба истифода дода шуд. Сохтмони мактаби мазкур аз ҷониби сохтмончиёни ҶДММ «Аъзам-2»-и ноҳияи  Мастчоҳ   бо сарфи 1 млн. 319 ҳазор  сомонӣ  барои 240 хонанда дар як баст анҷом ёфт. Сарвари давлат Эмомалӣ Раҳмон зимни сафари корӣ дар шаҳру ноҳияҳои вилояти Суғд 24 март дар маросими баистифодадиҳии ин мактаб иштирок карда, аз синфхонаҳо дидан намуд ва ба кори сохтмончиён баҳои баланд дода, хонандагонро ба хондани хубу аъло ҳидоят намуд. Бояд гуфт, ки муҳассилини ин деҳа қаблан дар мактабе, ки дар  замони Шӯравӣ бунёд ёфта, ҳамагӣ дорои 4 синфхона буд, то синфи 8 таҳсил намуда, минбаъд таҳсилро дар маркази ноҳия, ки аз деҳа 3 километр дур буд, давом медоданд. Мавриди тазаккур аст, ки дар шафати мактаби нав майдонча ва толори бузурги варзишии дорои тамоми лавозимоти варзишӣ низ мавриди истифода қарор гирифт. Мактаб дорои синфхонаи компютерӣ ва кабинетҳои фаннӣ буда, 240 нафар хонанда дар он таҳсил менамоянд.