ҚАБУЛИ ҚОНУНҲОИ НАВИ ЭКОЛОГӢ

    Душанбе, 19 апрел. (АМИТ «Ховар», Лаззат Диловарзод). — Раиси Кумитаи ҳифзи муҳити зист Талбак Салимов зимни баргузории нишасти матбуотӣ  ба хабарнигорон иттилоъ дод, ки бо мақсади пешбурди сиёсати экологӣ дар сатҳи миллӣ  чанд қонун, аз ҷумла Қонуни Ҷумҳурии Тоҷикистон «Дар бораи иттилооти экологӣ», ҚҶ Тоҷикистон «Дар бораи маърифати экологӣ», ҚҶ Тоҷикистон «Дар бораи мониторинги экологӣ» қабул гардид. Барои аз сари нав таҳия намудани Қонуни Ҷумҳурии  Тоҷикистон «Дар бораи ҳифзи табиат» дар назди Кумита гурӯҳи корӣ таъсис ёфт ва он аз натиҷаи кори худ давра ба давра ба Маҷлиси намояндагони Маҷлиси Олӣ  таклифҳо пешниҳод мекунад. Ҳамзамон, лоиҳаи нави Кодекси ҷангал дар ҳамкорӣ бо вакилони Маҷлиси намояндагони Маҷлиси Олӣ ва Дастгоҳи иҷроияи Президенти ҶТ дар шакли нав таҳия шуда,  ба баррасӣ  пешниҳод гардид.    Раиси Кумитаи мазкур ба  саволҳои хабарнигорон оид ба пешгирии ҳодисаҳои табиӣ, вазъи экологии  атрофи  корхонаҳои саноатӣ,  ҷамъоварӣ ва безараргардонии лампаҳои люминестӣ ва коркарди онҳо ҷавобҳои  қаноатбахш дод.    Раиси кумита  ҳамчунин иттилоъ дод, ки соли ҷорӣ аз сабаби камбориш омадани моҳҳои январ – март дар ҳавзаи дарёҳои Оби Хингов, Ёхсу ва Қизилсу   барф аз меъёр 30 фоиз камтар захира шудааст. Аҳолие, ки дар соҳили ин дарёҳо зиндагӣ намуда,  ба корҳои хоҷагидорӣ машғул мебошанд, обро бояд самаранок истифода намоянд.