НАВРӮЗ ДАР АСТРАХАН

Душанбе, 19 апрел. (АМИТ «Ховар», Гулрӯ Ниёзова).- Дирӯз дар боғи марказии маданӣ-фароғатии Аркадийи шаҳри Астрахани Русия бо ташаббуси Ҳукумати вилояти Астрахан ва шаҳрдории он иди  арӯси сол "Наврӯзи хуҷастапай " ҷашн гирифта шуд. Миёни намояндагони  ҷамъиятҳои гуногунмиллати Астрахан  дар ин ҷашн ҳамдиёрони мо низ иштирок доштанд. Аз тарафи ҷамъияти тоҷикони Астрахан раиси ҷамъияти тоҷикони ин вилоят Раҳматуллои Лоиқ ва сарвари ҷамъияти занони вилоят Ҷамила Қаландарова сухан гуфтанд. Ҳамзамон дар саҳни майдончаи боғи Аркадий хаймаи тоҷикӣ қомат афрохта буд, ки парчами Тоҷикистон дар боми он ҷилвагар буд. Дар наврӯзгоҳ тамоми нозу неъматҳои ҳунари миллии иштирокдорон муҳайё буда, зери суруду мусиқии тоҷикӣ гулдухтарони тоҷик бо либосҳои миллии баҳорӣ ба маҳфил ҳусни дигар зам намуданд. Дар ин бора ба мухбири АМИТ «Ховар» хабарнигор Мирзо Асозода аз шаҳри Астрахани Русия хабар дод.