МАСЪУЛИЯТИ ТОЗАГИИ МУҲИТ БАР ДӮШИ КИСТ ?

Душанбе, 4 июн. (АМИТ «Ховар», Дилшодаи Хайруллоҳ). — Дирӯз бахшида ба  рӯзи касбии кормандони Корхонаи воҳиди давлатии «Хоҷагии коммуналию манзилӣ»  дар корхонаи мазкур бо иштироки  кормандон ва собиқадорони соҳа ҷамъомад доир гардид. Зимни он масъулини корхона  оид ба  дастовардҳои Корхонаи воҳиди давлатии  «Хоҷагии манзилию коммуналӣ»  дар давоми солҳои истиқлолият ибрози назар карданд. Қайд гардид, ки корхонаи мазкур барои беҳтар намудани вазъи санитарии шаҳру ноҳияҳои мамлакат пайваста тадбирҳои зарурӣ меандешад. Ҳамчунин барои таъмини аҳолӣ бо оби ошомиданӣ бо дастгирии Ҳукумати Ҷумҳурии Тоҷикистон корхонаи мазкур бо  техникаву технологияи муосир таъмин гардидааст. Дар  чорабинӣ  зикр гардид, ки  аз ҷониби Ҳукумати мамлакат барномаи ислоҳоти хоҷагиҳои коммуналию манзилӣ  қабул гардида буд, ки дар ин доира муассисаҳои зертобеи  Корхонаи воҳиди давлатии «Хоҷагии коммуналию манзилӣ»  бо шароити хуби корӣ таъмин гардиданд.               Таъкид гардид, ки масъулияти таъмини тозагии муҳит, беҳтар намудани вазъи санитарии шаҳру ноҳияҳо ва ҳамчунин дастраси аҳолӣ намудани оби ошомиданӣ  бар дӯши кормандони Корхонаи воҳиди давлатии «Хоҷагии коммуналию манзилӣ» аст.