Ҳамкории тиҷоратӣ рушд меёбад

Душанбе,  20  июл. (АМИТ «Ховар», Покиза  Маҳмадбекова ). –  18  июл  муовини  раиси Палатаи савдо ва  саноати  ҶТ  Асаналӣ Карамалиев  дар  шаҳри  Душанбе бо  ҳайати  вакилони тоҷирони  Туркия – намояндагони  ширкати «Силвер» мулоқот  намуд.
Тавре дар  Палатаи  савдо  ва  саноати  ҷумҳурӣ  ба  АМИТ «Ховар»  иттилоъ  доданд, А.Карамалиев  дар  ҷараёни  мулоқот  зикр  намуд, ки  «бисёр ширкатҳои  Туркия дар  Тоҷикистон фаъолият  дошта,  дар  намоишгоҳҳои Палатаи  савдо  ва  саноати  ҶТ  маҳсулоти  худро  ба  маърази намоиш мегузоранд».
Роҳбари  ширкати «Силвер»  Ҳасан Ҳаскараман хабар  дод, ки  ширкати  мазкур  соли 1958  таъсис ёфта,  ба  истеҳсоли  таҷҳизоти  гуногуни  барқӣ  машғул  буда ва  дар  Қирғизистон, Қазоқистон, Озарбойҷон  ва  Русия  намояндагиҳои  худро  дорад. Ширкат  азм  дорад, ки  бо  Тоҷикистон  ҳам  фаъолона  ҳамкорӣ намояд.
А.Карамалиев  ба  меҳмонон  тавсия  намуд, ки  бо роҳбарияти Вазорати энергетика  ва  саноати ҶТ  вохӯрда,  бо  корхонаҳои он  муносибатҳои  ҳамкорӣ  барқарор  намоянд. Ҳоло бисёр  корхонаҳои  вазорати  номбурда  аъзои  Палатаи  савдо  ва  саноати ҶТ  буда,  палата  омода  аст, ки  ба  онҳо  ҳамаҷониба  кӯмак  намояд.