Ҳифзи табиати кишвар-вазифаи муқаддас

Хоруғ, 21 июл. (АМИТ «Ховар», Лутфишоҳ Додоев). – Фаъолияти Раёсати ҳифзи муҳити зисти вилоят дар нимаи аввали соли ҷорӣ дар мушовараи васеъ мавриди баррасӣ қарор гирифт. Тавре муовини сардори раёсат Фарҳод Мамадназарбеков иттилоъ дод, мутахассисон 385 иншооти гуногунро мавриди санҷиш қарор дода, ҳодисаҳои риоя нашудани талаботи экологиро муайян намуданд. Маълум шуд, ки то ин муддат ба олами наботот ва захоири табий ба маблағи беш аз 727 ҳазор сомонӣ зиён ворид гардидааст. Дар ин давра аз ҳисоби ҷарима ва пардохт аз истифодаи захоири табиӣ ба суратҳисоби раёсат 241 сомонӣ ворид гардид. Дар мавсими ободонӣ ва кабудизоркунӣ беш аз 600 ҳазор бех ниҳолҳои сояафкану ороишӣ ва баҳрабардор шинонида шуда, гулгашту марғзор бунёд гардид. Ҳамзамон Фарҳод Мамадназарбеков изҳори нигаронӣ намуд, ки то ҳанӯз ба шикори ғайриқонунии гӯсфанди Марко Поло хотима наёфта, аз шахсони гунаҳкор бо ҳар баҳона маблағи зарари ба олами ҳайвонот расонидашуда ситонида намешавад. Ҳамчунин ҳодисоти ғайримақсад истифода бурдан ва шӯршавии замин ба мушоҳида мерасад, аммо ба хотири беҳбудии кор дар ин самт тадбир андешида намешавад.