9 патент ва 33 шаҳодатномаи муаллифӣ

Душанбе, 26 июл. (АМИТ «Ховар», Лаззат Диловарзод).- Бино ба иттилои президенти Академияи илмҳои кишоварзӣ, академик Ҳукматулло Аҳмадов олимони Пажӯҳишгоҳи зироаткорӣ барои офаридани навъҳои нави зироати кишоварзӣ соҳиби 9 патент ва 33 шаҳодатномаи муаллифӣ гардиданд.Ба иттилои ҳамин манбаъ бо қарори Комиссияи давлатии озмоиши навъҳои зироати кишоварзӣ ва муҳофизати навъҳои Вазорати кишоварзии Ҷумҳурии Тоҷикистон 8 навъи зироати офаридаи олимони Пажӯҳишгоҳи зироаткорӣ, аз ҷумла барои кишти пахтаи маҳиннахи гулаш пӯшидаи «Авесто», пахтаи миёнанахи «20 – солагии Истиқлолият», «Ориёӣ», гандуми мулоимдонаи дуфаслаи «Садоқат», шолии «Саразм», наски «Соҳибӣ» ва зағири «Ҳисор — 10» дар минтақаҳои гуногуни ҷумҳурӣ иҷозат дода шуд. Ҳамзамон, 4 навъи зироат: пахтаи миёнанахи «Шарора — 1020», «Дӯстӣ», нахӯди «Сино», ҷуворимаккаи «Зарафшон» навъҳои ояндадор дониста шуданд. Пахтаи миёнанахи «Зуҳал» ва «Фаровон — 20», гандуми мулоимдонаи «Бохтар» ба таври расмӣ аз санҷиши давлатӣ гузаштанд.