Барқияи тасаллияти Эмомалӣ Раҳмон ба Дмитрий Медведев

Душанбе, 13 июл. (АМИТ «Ховар»). – Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Дмитрий Медведев барқияи тасаллият ирсол намуд, ки дар он, аз ҷумла, чунин омадааст:Дмитрий Анатолевичи мӯҳтарам, Дар Тоҷикистон хабари дар обанбори Куйбишеви Тотористон дучори фалокат гардидани киштии «Булгария» — ро, ки боиси ҳалокати одамони сершумор гардид, бо андӯҳи гарон дарёфтанд. Хоҳиш мекунам, дар ин лаҳзаи андӯҳгин аз номи Ҳукумат ва халқи Ҷумҳурии Тоҷикистон ҳамдардию тасаллияти амиқро ба ақрабону пайвандони ҳалокшудагон расонед.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.