Боз кӣ ба курсии вакилӣ менишинад?

Душанбе, 22 июл.(АМИТ «Ховар», Марзия Саидова).- Тибқи қонунгузории Ҷумҳурии Тоҷикистон ваколати вакили Маҷлиси намояндагони Маҷлиси Олии Ҷумҳурии Тоҷикистон Ҳусейн Алиев қатъ мегардад. Бояд зикр кард, ки Ҳусейн Алиев 21 июли соли 2011 бо Фармони Президенти ҷумҳурӣ Эмомалӣ Раҳмон, иҷрокунандаи Раиси ноҳияи Тоҷикобод таъин гардид. Ҳусейн Алиев аз ҳавзаи якмандатии умумиҷумҳуриявӣ аз рӯйхати Ҳизби Халқӣ-Демократии Тоҷикистон вакили Маҷлиси намояндагон интихоб гардида буд. Тибқи иттилои Муҳибулло Додоҷонов, роҳбари Дастгоҳи Комиссияи марказии интихобот ва раъйпурсии Ҷумҳурии Тоҷикистон ба ҷои Ҳ. Алиев бидуни баргузории интихобот тибқи рӯйхати ҲХДТ номзади навбатӣ аз ҲХДТ интихоб карда мешавад, ки ӯ Ашӯрбек Расулов, муовини вазири маорифи ҷумҳурӣ мебошад.Дар назар аст, ки баъди аз таътил бозгаштани вакилони палатаи поёнии парлумони мамлакат охири моҳи сентябр, Маҷлиси намояндагони Маҷлиси Олии Ҷумҳурии Тоҷикистон дар мавриди қатъ намудани ваколатии вакили МН МОҶТ Ҳусейн Алиев қарори марбута қабул менамояд. Ба гуфти Муҳибулло Додоҷонов, дар иҷлосияи ғайринавбатии Маҷлиси намояндагон, ки нимаи дуюми моҳи августи соли 2011 баргузор мегардад, танҳо масъалаи авф баррасӣ мегардад.Мавриди зикр аст, ки Ҳусейн Алиев сеюмин вакили Маҷлиси намояндагон аз рӯйхати ҲХДТ аст, ки баъди Ҷумъабой Сангинов ва Талбак Салимов ба вазифаи давлатӣ таъин карда мешавад. Ҷумъабой Сангинов муовини аввали Раиси вилояти Суғд ва Талбак СалимовРаиси Кумитаи ҳифзи муҳити зисти назди Ҳукумати ҷумҳурӣ таъин гардида буданд. Ба ҷои онҳо Олимҷон Сафаров- мовини Раиси ноҳияи Ҷиргатол ва Ҳаёт Одинаев — устоди Донишгоҳи миллии Тоҷикистон ба курсии вакилӣ дар Маҷлиси намояндагон нишастанд.