«Чакомаи гесӯ» дар Ваҳдат

Ваҳдат, 21 июл. (АМИТ «Ховар», Зебо Давлатова). – Дар саҳни толори “Қасри фарҳанг»-и шаҳри Ваҳдат бо иштироки сокинони тамоми ҷамоатҳои деҳот ва шаҳраки шаҳри Ваҳдат намоиши ҳунарҳои мардумӣ, аз қабили сабадбофӣ, гулдӯзӣ, оҳангарӣ ва ороиши дастурхон бо таомҳои миллӣ баргузор гардид.  Дар толори консертии «Қасри фарҳанг» намоиши сару либоси миллӣ бо ҳунари машшотаҳо диққати ҳозиринро ба худ ҷалб намуд. Намоиши «Чакомаи гесӯ» бо иштироки занону духтарон хотирмон гузашт. Раиси Кумитаи кор бо занон ва оилаи назди Ҳукумати Ҷумҳурӣ Сумангул Тағоева зимни суханронӣ гуфт, ки мақсад аз баргузории озмун аз нав эҳё намудани сару либоси миллӣ ва тарғиби мӯи дарози тоҷикдухтарон мебошад.