Дархости сармоягузориҳои яклухт ва имтиёзнок

Душанбе, 29 июл. (АМИТ «Ховар», Покиза Маҳмадбекова). — Дар бинои Дастгоҳи марказии Бонки давлатии амонатгузории Ҷумҳурии Тоҷикистон «Амонатбонк» (БДА) мулоқоти ҳайати кории Бонки давлатии рушди Чин (БДРЧ) бо роҳбарият ва масъулини «Амонатбонк» доир гардид.Ба мухбири АМИТ «Ховар» аз Хадамоти матбуот ва рекламаи БДА «Амонатбонк» иттилоъ доданд, ки ҳайати кории БДРЧ ҷиҳати анҷоми омӯзиш ва таҳлили як зумра лоиҳаҳои инвеститсионӣ ва доир намудани мулоқот бо масъулини Вазорати рушди иқтисод ва савдои ҶТ ва БДА ҶТ «Амонатбонк» бо сафари чандрӯза ба Ҷумҳурии Тоҷикистон ташриф овардааст.Дар мулоқот ҳайати кории БДРЧ-ро сардори раёсати аввали баррасии лоиҳаҳои БДРЧ Чжан Тсинмин ва ҳайати Тоҷикистонро раиси Раёсати БДА «Амонатбонк» Гулнора Ҳасанова роҳбарӣ намуд. Дар мулоқот ҷониби Чин иброз намуд, ки мақсад аз ташрифи ҳайат аз таҳлилу баррасии лоиҳаҳои сармоягузоришуда ва дар баробари ин тарҳрезӣ ва баррасии лоиҳа ва пешниҳоди самаранок аст. Ҳамзамон ҷониби «Амонатбонк» якчанд пешниҳодро ҷиҳати сармоягузорӣ ва дастгирии соҳибкорӣ ва дигар соҳаҳои ҳаёти ҷумҳурӣ манзур намуд.Бояд гуфт, ки БДРЧ яке аз бонкҳои бонуфузи Ҷумҳурии Мардумии Чин ба шумор рафта, соли 1994 таъсис ёфтааст. Дороиҳои бонк 700 млрд. доллари ИМА-ро ташкил дода, фаъолияти асосии он сармоягузорӣ ба лоиҳаҳои хурду бузург дар дохил ва хориҷи кишвар аст. 22 лоиҳаи хурду бузурги иқтисодиёти Ҷумҳурии Тоҷикистон Тавассути «Амонатбонк» аз тарафи БДРЧ сармоягузорӣ карда мешавад.