Даромади пулии аҳолӣ беҳтар шуд

Душанбе, 20 июл. (АМИТ «Ховар», Лаззат Диловарзод).- Дар нишасти матбуотие, ки ба ҷамъбасти фаъолияти нимаи аввали соли 2011-и  Вазорати меҳнат ва ҳифзи иҷтимоии аҳолӣ  бахшида шуд,  вазири  соҳа  Маҳмадамин Маҳмадаминов аз «Стратегияи миллии рушди Ҷумҳурии Тоҷикистон  барои то давраи соли 2015», «Стратегияи давлатии рушди бозори меҳнати Ҷумҳурии Тоҷикистон то соли 2020», «Стратегияи паст кардани сатҳи камбизоатӣ дар ҷумҳурии Тоҷикистон барои солҳои 2010 — 2012», «Консепсияи ҳифзи иҷтимоии аҳолии Ҷумҳурии Тоҷикистон», «Консепсияи ислоҳоти музди меҳнат», «Консепсияи сиёсати давлатии мусоидат ба шуғли аҳолии Ҷумҳурии Тоҷикистон» дар робита ҷиҳати татбиқи сиёсати иҷтимоию меҳнатии Ҳукумати ҷумҳурӣ ба таври хеле васеъ маълумот ироа намуд, ки он  барои имрӯзу  ояндаи ҳаёти иҷтимоии аҳолии кишвар аз манфиат холӣ нест.Вазир арзиши маҷмӯи озуқавории барои истеъмол зарурро тибқи маълумоти Агентии омори назди Президенти ҷумҳурӣ аз рӯи истеъмоли ҳақиқӣ бо нархҳои охири моҳи майи соли 2011 барои ҳар як узви оила моҳе 132 ва дар сурати истеъмоли оқилона 255 сомонӣ шуморид.Бо вуҷуди  фаъолияти хуби кормандони соҳаи   ҳифзи иҷтимоии аҳолӣ бартараф намудани қарздорӣ аз музди меҳнат ба онҳо муяссар нашуд ва то 1 –уми июни соли 2011 қарздорӣ аз пардохти музди меҳнат дар ҷумҳурӣ бо назардошти қарзҳои пешина 11 млн. 837 ҳазор сомониро  ташкил додастааст, ки он асосан ба шаҳру ноҳияҳои тобеи ҷумҳурӣ рост меояд.Ҳолати қарздорӣ аз музди меҳнатро дар шаҳру ноҳияҳои вилояти Хатлон вазир нигаронкунанда донист, ки он нисбат ба аввали соли ҷорӣ 10 фоиз афзоиш ёфтааст.