Даври дуюми таҳлилу таҳқиқи коррупсия

Душанбе, 26 июл. (АМИТ «Ховар», Анварбек Сиддиқов).- 26 июл Маркази тадқиқоти стратегии назди Президенти Ҷумҳурии Тоҷикистон якҷоя бо Барномаи рушди СММ дар Ҷумҳурии Тоҷикистон натиҷаи ҷамъбасти даври дуюми тадқиқоти «Коррупсия дар Ҷумҳурии Тоҷикистон»-ро муаррифӣ намуд. Дар ин маросим авзои мушаххас мавриди таҳлил қарор гирифта, масоили коррупсия ҳамчун падидаи иҷтимоию иқтисодии кишвар зикр карда шуд. «Масъалаи коррупсия вақтҳои охир мавзӯи доғи рӯз ва мубоҳисавии кишвари мо гардидааст. Ин падида дар ВАО чун монеаи ҷиддӣ дар роҳи рушди ҷомеаи солим ва вабои иҷтимоӣ маънидод гардида, дахолат ва аз байн бурдани онро аз ҷониби давлат ва ҷомеа талаб мекунад»- гуфт директори Маркази тадқиқоти стратегии назди Президенти Ҷумҳурии Тоҷикистон Сӯҳроб Шарифов.Дар ҷараёни таҳқиқ нуқтаи назари беш аз 3000 нафар сокинони минтақаҳои гуногуни ҷумҳурӣ фаҳмида шуд. -Ҳадафи тадқиқоти мо ошкор намудан ва таҳлили афкори аҳли ҷомеа перомуни арзёбии ҷиноятҳои коррупсионӣ, зуҳур ёфтан ва таҳлили хусусиятҳои он дар бахшҳои гуногуни ҳаёти иҷтимоию иқтисодии кишвар аст,- гуфт С. Шарифов.