Эҳдои «Ховар»-иён

Душанбе, 22 июл.(АМИТ «Ховар», Марзия Саидова).-Агентии миллии иттилоотии Тоҷикистон /АМИТ/ «Ховар» дар радифи дигар вазорату идораҳои ҷумҳурӣ ҷиҳати мукаммал гардонидани хазинаи Китобхонаи миллии ҷумҳурӣ ба ин махзан беш аз 600 адад китоб тақдим намуд. Адабиёту китобҳое, ки АМИТ «Ховар» ба Китобхонаи миллӣ эҳдо намудааст, гуногунмавзӯъ –сиёсию иқтисодӣ, бадеию публитсистӣ мебошанд. Инчунин, кормандони Агентии иттилоотӣ китобу маҷмӯаҳоеро, ки доир ба жанрҳои гуногуни журналистика нашр шудаанд, ба Китобхонаи миллӣ супориданд.Бояд зикр кард, ки бинои наву замонавии Китобхонаи миллӣ, ки сохтмонаш дар шафати муҷассамаи асосгузори нахустин давлати тоҷикон –шоҳ Исмоили Сомонӣ бо суръат идома дорад, дар рӯзҳои таҷлили ҷашни муқаддас- 20-умин солгарди Истиқлолияти давлатии Ҷумҳурии Тоҷикистон дар маросими ботантана мавриди баҳрабардорӣ қарор дода мешавад. Бинои китобхонаи миллӣ аз 9 ошёна иборат буда, он барои нигоҳ доштани беш аз 10 миллион китоб пешбинӣ шудааст.