Хизматрасонӣ дар фурудгоҳ беҳтар шудааст ?

Душанбе, 25 июл. (АМИТ «Ховар», Мавзуна Бойева). –  Фурудгоҳи байналмилалии Душанбе дар шашмоҳаи якуми соли 2011 ба 296 ҳазору 774 мусофири буруншуда ва 209 ҳазору  622 мусофири воридшуда хизмат расонид. Миқдори умумии бор ва почтаи қабулу интиқолшуда аз ҷониби анбори тиҷоратии фурудгоҳ 1362 тоннаю 773 кг-ро ташкил дода, ба 3239 хатсайри доимию чартерӣ хизмат расонида шуд, -гуфт 25 июл дар нишасти матбуотии ҷамъбастии шашмоҳаи соли равон муовини директори генералии ҶСК «Фурудгоҳи байналмилалии Душанбе» Азиз Иброҳимов ба хабарнигорони ватанию хориҷӣ. Ба сурати умум аз рӯи моҳҳо тамоюли  болоравӣ ва камшавии ҳамлу нақли мусофирон ва борҳо ба назар мерасад.Сабаби чунин тамоюл пеш аз ҳама таъсири бӯҳрони ҷаҳонии молиявӣ ба ҳамаи намудҳои боркашонӣ, камшавии талабот ба хизмати муҳоҷирони меҳнатӣ дар мамлакатҳои ИДМ ва хориҷи наздик, инчунин суръати паст ва дар баъзе ҳолатҳо коҳиш ёфтани рушди иҷтимоию иқтисодии мамлакатҳое мебошад, ки бо Ҷумҳурии Тоҷикистон алоқаи ҳавоӣ доранд.Наомадан, осеб дидан ва гумшавии бағоҷҳо аз ҷумлаи масъалаҳои доғи  рӯз аст. Дар шашмоҳаи якуми соли 2011 дар мавриди  наомадан, осеб дидан ва гумшавии бағоҷ 298 эрод баён гардида, аз он 295-тояш қонеъ гардонида шуд ва 3 эрод  дар марҳилаи баррасӣ қарор дорад.