Хонандагони тоҷик 71 медал гирифтанд

Душанбе, 11 июл. (АМИТ «Ховар», Дилшодаи Хайруллоҳ).- «Дар нимсолаи аввали соли 2011 хонандагони болаёқати тоҷик дар олимпиадаҳои байналхалқӣ дар давлатҳои Амрико, Голландия, Туркия, Русия, Қазоқистон, Руминия, Озарбойҷон, Гурҷистон ва дигар кишварҳо иштирок намуда, 71 медал, аз ҷумла 9 медали тилло, 16 медали нуқра ва 46 медали биринҷӣ ба даст оварданд,- зикр намуд зимни нишасти матбуотӣ ба хабарнигорони ВАО муовини аввали вазири маорифи ҶТ Фарҳод Раҳимов. Мавсуф афзуд, ки беш аз 21 ҳазору 500 нафар хонандагони синфҳои 5-10 дар даври аввали олимпиадаи байналхалқии фосилавӣ иштирок намуда, зиёда аз 13 ҳазор нафари онҳо ба даври дуюм ва беш аз 6 ҳазор нафарашон ба даври финалӣ гузаштанд. Дар маҷмӯъ аз ин олимпиада хонандагони муассисаҳои таҳсилоти умумии ҷумҳурӣ 310 медал ба даст оварданд.Ҳамкориҳои вазорати маориф бо кишварҳои дуру наздики хориҷӣ ва созмонҳои байналмилалӣ густариш ёфта, байни вазорати маорифи ҶТ ва вазоратҳои маориф (ва илм)-и кишварҳои хориҷӣ 38 ва созмонҳои байналмилалӣ 53 созишномаю тафоҳумнома ҷиҳати ҳамкорӣ ба имзо расид,- афзуд Фарҳод Раҳимов.