Иншоотҳои муҳими замонавӣ

Хоруғ, 22 июл. (АМИТ «Ховар», Лутфишоҳ Додоев). Дар деҳаи Миденшори ҷамоати деҳоти Поршнев бунёди биноҳои маркази маъмурӣ, намояндагии Хадамоти назорати давлатии фаъолияти фармасевтӣ ва шӯъбаи «Тоҷиксодиротбонк» — и ноҳия идома дорад. Сардори намояндагии Хадамоти назорати давлатии фаъолияти фармасевтии ноҳияи Шуғнон Иқбол Исломбеков ва сармуҳандиси сохтмон Оқилназар Охирназаров зимни сӯҳбат иброз доштанд, ки бинои намояндагии Хадамоти назорати давлатии фаъолияти фармасевтии ноҳияи Шуғнон 9 сентябри соли равон, яъне дар ҷашни 20 – солгарди истиқлолияти давлатӣ ба истифода дода мешавад.Сохтмон аз тарафи Маркази хадамоти назорати давлатии ҷумҳуриявӣ, маблағгузорӣ шуда, ҳоло бо масолеҳи сохтмонӣ ва қувваи кории пурра таъмин мебошад. Бинои шӯъбаи «Тоҷиксодиротбонк» — и ноҳия бо тарҳи зебо қомат афрохтааст. 14 нафар сохтмончиён аз шаҳри Қошғари Ҷумҳурии Мардумии Чин дар бунёди иншооти мазкур кор мекунанд ва кӯшиш доранд, ки он хеле зебо сохта шавад.