Июл — гармтарин моҳ

Душанбе, 7 июл. (АМИТ «Ховар», Марзия Саидова). — Июл аз моҳҳои гармтарини фасли тобистон аст. Дар ин моҳ ҳарорати ҳаво дар кишвар то чанд дараҷа гарм мешавад? Бо ин ва дигар саволҳо хабарнигори АМИТ «Ховар» ба сардори Маркази обуҳавошиносии ҷумҳурӣ Ҷамила Байдуллоева муроҷиат кард. Мавсуф дар посух ба саволи хабарнигор гуфт, ки аз 8 то 11 июли соли равон ҳарорати ҳаво дар қаламрави ҷумҳурӣ беш аз 40 дараҷа гарм мегардад. Аз ҷумла, ҳарорати ҳаво рӯзона дар қисмати ҷанубии кишвар -вилояти Хатлон 42-43 дараҷа, дар вилояти Суғд ва ноҳияҳои тобеи марказ 40 дараҷа, дар қисми ғарбии Вилояти Мухтори Кӯҳистони Бадахшон 31 дараҷа ва дар пойтахти ҷумҳурӣ -шаҳри Душанбе, 40-41 дараҷа гарм мешавад. Чунин ҳавои гарму тафсон меъёри моҳи июл ва фасли тобистон аст. Ба гуфти Ҷамила Байдуллоева дар моҳи июл воридшвии ҳавои ғуборолуд аз самти ҷанубу ғарби кишвар дар назар дошта шудааст. Мавсуф афзуд, ки дар охири моҳи июн ворид шудани ҳавои ғуборолуд ба Тоҷикистон, ки дар байни мардум ҳамчун «боди афғонӣ» маъмул аст, ҳарорати ҳаво каме салқин гардида буд. Вай гуфт ки чунин ҳавои ғуборолуд аз биёбонҳои Ироқу Эрон ва Туркманистон бархоста, тавассути Афғонистон ва Туркманистон ба фазои кишвармон паҳн гашта, муддати се рӯз идома ёфт.