Комёбии Исломзода дар Индонезия

Душанбе, 20 июл.(АМИТ «Ховар», Марзия Саидова).-Дар байни намояндагони 36 давлати  ҷаҳон Мифтоҳуддин Исломзода- донишҷӯи соли 2-юми факултаи улуми исломии  Донишкадаи исломии Тоҷикистон  дар озмуни байналмилалии ҳифз ва қироати Қуръони карим, ки  дар Индонезия доир гардид, дар   қироати 20 пора ғолиб баромада, зинаи сеюмро ишғол намуд.Абдуалим Наврасов, мудири кафедраи улуми Қуръони Донишкадаи исломии Тоҷикистон дар сӯҳбат ба хабарнигори АМИТ «Ховар» гуфт, ки ҳамзамон 3 нафар донишҷӯи донишкада дар озмуни ҷумҳуриявии «Ҳифз ва қироати Қуръони карим», ки бо ташаббуси Президенти ҷумҳурӣ Эмомалӣ  Раҳмон дар Душанбе баргузор гардид, ҷойҳои якум, дуюм ва сеюмро ишғол намуда, бо ҷоизаи сафари ҳаҷ, ки аз ҷониби Президенти  кишвар пешниҳод шуда  буд, сарфароз гардиданд.А. Наврасов афзуд, ки донишҷӯёни Донишкадаи исломии Тоҷикистон, хусусан бахши  улуми қуръонии он  тӯли солҳои охир дар чандин озмунҳои байналмилалии ҳифз ва қироати Қуръон дар   кишварҳои исломӣ ба мисли Эрону Арабистони Саудӣ иштирок намуда, комёб гардидаанд.