Мулоқоти О. Оқилов бо В. Гаркун

                                                                                                                             Душанбе, 14 июл. (АМИТ «Ховар», Пайрав Назаров). – 13 июл Сарвазири Ҷумҳурии Тоҷикистон Оқил Оқилов ба ҳайси роҳбари Кумитаи тадорукотӣ оид ба омодагирӣ ва доир намудани ҳамойиш бо Муовини аввали Раиси Кумитаи иҷроия — Котиби иҷроияи ИДМ Владимир Гаркун мулоқот намуд. Ин мулоқот дар доираи омодагирӣ ба иҷлосияҳои Шӯрои сарони давлатҳо ва Шӯрои вазирони корҳои хориҷии ИДМ, ки бояд дар оғози моҳи сентябри соли равон дар шаҳри Душанбеи Тоҷикистон баргузор гардад, сурат гирифт.Ҷонибҳо дар ҷараёни мулоқот масоили амалии марбут ба таъмини ташкили хушсифати иҷлосияҳои мақомоти олии Иттиҳод, рӯзнома, барнома ва тартиби пиёда намудани чорабиниҳои дар пешистодаи намояндагони олимақомро мавриди муҳокима қарор доданд. Ҳамчунин, масъалаҳои раисии Ҷумҳурии Тоҷикистон дар Иттиҳоди Давлатҳои Мустақил, ҷараёни иҷрои Нақшаи тадбирҳо бахшида ба 20 – солагии ИДМ, ҷиҳатҳои дигари ҳамкорӣ дар чаҳорчӯбаи Иттиҳод баррасӣ шуданд.Дар ин бора ба АМИТ «Ховар» дар дафтари матбуоти Кумитаи иҷроияи ИДМ иттилоъ доданд.