Омодагӣ ба тирамоҳу зимистони соли 2011 – 2012

Душанбе, 28 июл. (АМИТ «Ховар», Лаззат Диловарзод).- Корхонаи воҳиди давлатии (КВД) «Хоҷагии манзилию коммуналӣ» бо мақсади амалӣ намудани қарори Ҳукумати ҷумҳурӣ «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтаззам ва самарабахш дар давраи тирамоҳу зимистони солҳои 2011 — 2012» вобаста ба корхонаҳои зертобеи худ фармон содир намуд,- иброз дошт директори КВД «Хоҷагии манзилию коммуналӣ» Алимурод Тағоймуродов ба мухбири АМИТ «Ховар».Ба иттилои манбаъ, корхонаҳои хоҷагии манзилию коммуналӣ вазифадор шуданд, ки дар мӯҳлати муайяншуда ситодҳои фаврӣ ташкил намуда, нақшаи чорабиниҳоро вобаста ба иҷрои қарори Ҳукумати ҷумҳурӣ дар давоми ду ҳафта ба роҳбарияти КВД «Хоҷагии манзилию коммуналӣ» пешниҳод намоянд. Баҳри таъмини бандҳои 1 ва 2 –и қарори мазкур ситодҳои доим амалкунанда нақшаи чорабиниҳоро бо мақомоти иҷроияи маҳаллии ҳокимияти давлатии шаҳру ноҳияҳо мувофиқа ва тасдиқ намуда аз омадагии худ ба тирамоҳу зимистони соли 2011 -2012 ба КВД «Хоҷагии манзилию коммуналӣ» иттилоъ пешниҳод менамоянд.