Сӯҳбати Ҳ.Зарифӣ бо Лорд Вейверли

Душанбе, 27 июл. (АМИТ «Ховар», Пайрав Назаров). – 26 июли соли 2011 Вазири корҳои хориҷии Ҷумҳурии Тоҷикистон Ҳамрохон Зарифӣ Раиси гурӯҳи парлумонии Британияи Кабир оид ба масоили Осиёи Марказӣ ва Тоҷикистон Лорд Вейверлиро ба ҳузур пазируфт. Тавре дар Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» иттилоъ доданд, ҷонибҳо дар ҷараёни мулоқот масъалаҳои ҳамкории минтақавӣ, вазъи Афғонистон ва ҳамкории ҳар ду кишвар дар ин самт, рушди муносибатҳои дуҷонибаи иқтисодию тиҷоратӣ, ҳамчунин ҷалби сармояҳои Британия ба иқтисодиёти Тоҷикистонро мавриди муҳокима қарор доданд. Дар ин самт масъалаи ташкили сафари ҳайати намояндагони аҳли тиҷорати Британия ба Ҷумҳурии Тоҷикистон дар нимаи аввали соли 2012 баррасӣ шуд.Ҳ.Зарифӣ таваҷҷӯҳи мусоҳибро ба зарурати гузоштани заминаи мустаҳками муносибатҳои дуҷониба ба манзури фароҳам овардани шароити мусоид барои аҳли тиҷорати Британия ҷалб намуд.Лорд Вейверли Вазири корҳои хориҷиро аз доир намудани конфронс оид ба масоили Осиёи Марказӣ, ки бояд бо ибтикори ширкати «Dithley Foundation» моҳи ноябри соли равон дар Британияи Кабир баргузор гардад, воқиф намуда, гуфт, ки бояд ҳайати олимақоми ҷониби Тоҷикистон дар он ширкат варзад.