«Шоҳмансур» ихтисосӣ мегардад

Душанбе, 14 июл.(АМИТ «Ховар», Марзия Саидова).-Шурӯъ аз фардо, 15 июли соли равон, бозори «Шоҳмансур»-и Душанбе, ки дар байни мардум бо номи «Зеленый» маъмул аст, танҳо барои фурӯши маҳсулоти кишоварзӣ, агросаноатӣ ва маводи ғизоӣ махсус гардонида мешавад.Ин тадбир дар асоси қарори шаҳрдорӣ бо мақсади аз рӯи таъинот ба роҳ мондани фаъолияти бозорҳои шаҳр, ки ба фурӯши маҳсулоти кишоварзӣ ихтисос доранд, инчунин нигоҳ доштани нархи маҳсулоти ниёзи аввал ва зиёд намудани нуқтаҳои фурӯши маҳсулоти кишоварзӣ ва маводи хӯрокӣ андешида шудааст, иттилоъ дод котиби матбуотии Раиси шаҳри Душанбе Шавкат Саидов.Дар робита ба ин Сайвалӣ Сафаров, муовини соҳавии Раиси шаҳри Душанбе, вазифадор гардидааст, ки дар ҳамкорӣ бо Раёсати корҳои дохилии шаҳри Душанбе ва дигар сохторҳои марбута, хусусан маъмурияти бозор барои ҷилавгирӣ аз фурӯши маҳсулоти саноатӣ дар ҳудуди бозори «Шоҳмансур» тадбирҳои зарурӣ андешад.