Сохтмони бинои нави мақомот дар ноҳияи Шаҳринав

Шаҳринав, 22 июл. (АМИТ«Ховар», Дилшодаи Хайруллоҳ). – Нимаи дуюми рӯз Сарвари давлат Эмомалӣ Раҳмонро сокинону фаъолони ноҳияи Шаҳринав бо самимияти хосса истиқбол гирифтанд. Нахуст Президенти кишвар Эмомалӣ Раҳмон дар ҷараёни сафари кории худ бинои хуштарҳу муосири мақомоти иҷроияро, ки аз ҷониби сохтмончиёни ҶДМ «Султон» дар маркази шаҳраки навбунёди Шаҳринав қомат афрохтааст, мавриди баҳрабардорӣ қарор дод. Сохтмони бинои мазкур соли 2006 оғоз ёфта, барои корҳои сохтмонию васлгарӣ ва хариди таҷҳизоти он 4 миллиону 70 ҳазор сомонӣ масраф гардидааст. Қисмати аввали бино аз 24 утоқи корӣ ва толори маҷлис иборат мебошад. Акнун аз ин пас барои тамоми кормандони дастгоҳи мақомоти иҷроияи ҳокимияти давлатии ноҳия, ки пештар дар бинои собиқ беморхона фаъолият доштанд, шароит ва фазои мусоиди корӣ фароҳам оварда шуд.Бояд гуфт, ки қисмати дуюми бинои мақомот, ки аз шаш утоқи корӣ ва толори маҷлис барои 604 нафар иборат аст дар нимаи аввали соли 2012 мавриди истифода қарор хоҳад гирифт.