Сокинони Қӯрғонтеппа аз рӯи реҷа газ мегиранд

Қӯрғонтеппа,  25  июл. (АМИТ «Ховар»,  Мурод  Сотиев). –  Тавре  иҷрокунандаи  вазифаи  роҳбари  муассисаи «Қӯрғонтеппагаз»  Давлат  Ҳомидов  ба  АМИТ «Ховар» иттилоъ  дод,  90  фоизи  сокинони биноҳои  серошёнаи  шаҳри  Қӯрғонтеппа  бо  газ таъмин  шудаанд. Мувофиқи  суханони  Давлат  Ҳомидов  имрӯзҳо  ба  хонаҳои  истиқоматии  сокинони  шаҳр  мувофиқи  реҷаи  муайян  дар як  шабонарӯз  7  соат  газ  дода  мешавад. Сокинони  қарздор имконияти истифода  намудани  газро надоранд. Ба  гуфти  роҳбари  муассисаи  номбурда  вазъи  иқтисодии  «Қӯрғонтеппагаз» чун  пештара  вазнин  буда,  ҳоло  барои  баргардонидани  қарзи  ҳам  сокинон  ва  ҳам  корхонаҳои  шаҳр  чора  дида  мешавад. Қарзи  корхонаи  нуриҳои  азотии  Вахш  то  имрӯз  беш  аз 6  миллион  сомониро  ташкил  медиҳад.