«Созандагони Ватан»- қаноти ҲХДТ

Душанбе, 15 июл.(АМИТ «Ховар», Марзия Саидова).-Охири моҳи июл дар Душанбе нахустин конфронси иттиҳодияи ҷамъиятии ҷавонон бо номи «Созандагони ватан» баргузор мегардад. Иттиҳодияи мазкур бо пешниҳоди Раиси Ҳизби халқӣ- демократии Тоҷикистон Эмомалӣ Раҳмон созмон ёфтааст. Ҳадафи созмони «Созандагони ватан» ҷалби бештари ҷавонон ба сафи ҲХДТ, дар амал татбиқ намудани сиёсати созандагии ҳизб ва муқовимат бо ҳар гуна равияҳои номатлуби ифротӣ, ки вақтҳои охир миёни ҷавонон зуҳур намудаанд, ба шумор меравад. Ба кори конфронс намояндагон аз тамоми минтақаҳои ҷумҳурӣ даъват гардидаанд.Тавре Усмон Солеҳ, мудири шӯъбаи таблиғот, иттилоот ва матбуоти Дастгоҳи Кумитаи марказии ҲХДТ иброз дошт, ба иттиҳодияи ҷамъиятии «Созандагони ватан» ҷавонони аз 16 то 35 сола аъзо шуда метавонанд. ҲХДТ дар сафи худ 140 ҳазор нафарро муттаҳид намудааст, ки аз он 50 ҳазорашро ҷавонон ташкил медиҳанд.