Замин ҳанӯз ҳам самаранок истифода намешавад

Душанбе, 27 июл. (АМИТ «Ховар», ЛаззатДиловарзод).- Ба гуфти раиси Кумитаи давлатии заминсозӣ ва геодезии ҷумҳурӣ Маҳмадзоир Зокиров, солҳои охир ҳолати мелиоративии заминҳои обёришаванда тибқи қарори Ҳукумати ҷумҳурӣ «Дар бораи тадбирҳои беҳтар намудани вазъи мелиоративии заминҳои обёришавандаи ҶТ барои солҳои 2010 — 2014» беҳтар шуда бошад ҳам, аммо бархе хоҷагиҳо ҳоло ҳам заминро самаранок истифода намебаранд.
 
Агар соли 2009 18 ҳазору 103 гектар замини корам, аз ҷумла 14 ҳазору 967 гектар замини корами обӣ бо сабаби шӯршавӣ, ботлоқшавӣ, набудани об, аз кор баромадани шабакаҳои каналу иншооти дигари обёрикунӣ истифода нашуда бошад, соли 2010 дар ҷумҳурӣ 19 ҳазору 290 га замини обӣ аз гардиши кишоварзӣ берун монд, ки сабаби асосӣ ташкили ғайриқаноатбахши корҳои хоҷагидорӣ дар шаҳру ноҳияҳои ҷумҳурӣ мебошад.