Қонуни афв қабул мегардад

Душанбе, 18 август.(АМИТ «Ховар», Марзия Саидова).- 19 август палатаи поёнии парлумони Тоҷикистон –Маҷлиси намояндагон лоиҳаи Қонуни Ҷумҳурии Тоҷикистон «Дар бораи афв»-ро дар ҷаласаи ғайринавбатии худ баррасӣ менамояд. Лоиҳаи Қонуни мазкур, ки аз ҷониби Президенти ҷумҳурӣ Эмомалӣ Раҳмон ба парлумони мамлакат пешниҳод гардидааст, аз 29 модда иборат мебошад. Дар лоиҳаи қонун гурӯҳи шахсоне, ки нисбат ба онҳо афв татбиқ мегардад, тартиб ва мӯҳлати иҷрои санади зикргардида, мақомоти иҷрокунандаи ин санад, инчунин ҳалли дигар масъалаҳое, ки ба татбиқи Қонуни мазкур алоқаманданд, пешбинӣ гардидааст. Аз назари коршиносони масоили сиёсӣ дар моҳи мубораки Рамазон ва остонаи 20-умин солгарди ҷашни Истиқлолияти давлатии Ҷумҳурии Тоҷикистон баррасии ин санад бозгӯи иқдоми наҷибонаи Ҳукумати Ҷумҳурии Тоҷикистон ва Сарвари давлат буда, шаҳодати арзиши олӣ доштани ҳуқуқу озодиҳои инсон ва шаҳрванд дар ҷомеаи Тоҷикистон аст.