Қ. Расулзода: «Мардум вакилони худро хуб намешиносанд»

Душанбе, 19 август. (АМИТ «Ховар», Бекназари Абӯбакр). 19 августи соли ҷорӣ дар мақомоти иҷроияи ҳокимияти давлатии вилояти Суғд таҳти раёсати раиси вилоят Қоҳир Расулзода иҷлосияи VI – уми Маҷлиси вакилони халқи вилоят даъвати IV баргузор гардид.Дар кори иҷлосия аз 70 нафар вакилон 59 нафар иштирок намуданд. Раиси вилоят таъкид кард, ки бояд корҳои идеологӣ дар вилоят, бахусус дар ҷамоатҳои деҳот, маҳаллаву кӯчаҳо ҷоннок карда шуда, эътибор ба кадрҳои марбутаи соҳа дар сатҳи зарурӣ ба роҳ монда шавад. Ҳамчунин, Қоҳир Расулзода фаъолияти вакилонро дар ин самт суст арзёбӣ намуд. «Пурсиши афкори омма баёнгари он аст, ки аксари мардум вакилони худро хуб намешиносанд. Бояд, ки робитаи вакилону роҳбарон бо мардум дар заминаҳои ҳамгироӣ ва рафоқат ба роҳ монда шуда, ба ҳалли масоили иҷтимоӣ мусоидат намояд», — таъкид дошт Раиси вилоят.