Ҳадя ба духтарони Дарвоз

Душанбе, 10 август.(АМИТ «Ховар», Марзия Саидова).-Дар ноҳияи Дарвоз маркази омӯзиши дӯзандагӣ ба фаъолият шурӯъ кард, ки дар он 20 нафар духтарони ин ноҳияи дурдасти кӯҳистон нозукиҳои касби дӯзандагиро дар ду давра, ки ҳар як давра аз 2 ва 3 моҳ иборат аст, аз бар менамоянд.Коргоҳи мазкур бо иқдоми намояндагии Кумитаи байналмилалии имдоди Имом Хумайнии Эрон дар ҳамкорӣ бо Вазорати меҳнат ва ҳифзи иҷтимоии аҳолии ҷумҳурӣ ва мақомоти иҷроияи маҳаллии ҳокимияти давлатии ноҳияи Дарвоз таъсис ёфтааст.Бо ташкили коргоҳи дӯзандагӣ духтарони маҳаллӣ на танҳо касби дӯзандагиро аз бар менамоянд, балки тавассути қарзи бефоиз намояндагии Кумитаи имдод ба онҳо мошинаи дарздӯзӣ дастрас менамояд. Ин раванд имкон медиҳад, ки духтарони дарвозӣ дар оянда бо азбар намудани нозукиҳои касби чеварӣ барои худ кори мусоид пайдо намуда, вазъи иҷтимоии худро беҳтар намоянд.Саидҷаводи Разавӣ, мудири намояндагии Кумитаи имдод дар Тоҷикистон мегӯяд, дар асоси ҳамоҳангии роҳбарони мақомоти ноҳияи Дарвоз ва дигар ноҳияҳои наздисарҳадии Афғонистон духтарону занони афғон низ имкон доранд дар ин коргоҳ ҳунари чевариро аз худ намоянд.Алҳол дар минтақаҳои гуногуни Тоҷикистон беш аз 20 маркази омӯзишии дӯзандагӣ фаъолият менамоянд, ки онҳо дар беҳдошти рӯзгор ва вазъи иҷтимоии бонувону духтарони маҳаллӣ нақши муассир мебозанд.