«Ҳафтаи байналмилалии об» оғоз шуд

Душанбе, 23 август (АМИТ «Ховар», Пайрав Назаров). – 21 август «Ҳафтаи байналмилалии об» оғоз ёфт, ки имсол мавзӯи он «Об ва шаҳришавӣ (урбанизатсия)» мебошад. Имрӯз дар ҷаҳон беш аз 880 миллион нафар аз истифодаи оби нӯшокии бехатар маҳрум аст. Тавре Маркази навигариҳои СММ хабар медиҳад, ин маърака таҳти васояти Пажӯҳишгоҳи байналмилалии оид ба масоили оби Шведсия мегузарад, ки дар он муассисаю бунёдҳои СММ фаъолона иштирок менамоянд. Дар робита бо ин воқеаи фархунда намояндагони ҳукуматҳо, созмонҳои ғайриҳукуматӣ ва коршиносони кишварҳои мухталифи ҷаҳон ба манзури баррасии роҳҳои фароҳам овардани имконияти истифода аз оби поки нӯшокӣ дар шаҳри Стокголм ҷамъ омадаанд.