Ҷиноятҳо бояд пешгирӣ шаванд

Душанбе, 25 август. (АМИТ «Ховар», Лаззат Диловарзод).- Бино ба маълумоти ВКД дар давоми 8 моҳи соли ҷорӣ (то 22 – юми август) дар миқёси ҷумҳурӣ ҷиноятҳо аз қабили дуздӣ, ғоратгарӣ ва тасарруфи амволи ғайр нисбат ба ҳамин давраи соли 2010 бештар ба қайд гирифта шудаанд, ки бар асари онҳо 63 нафар ҷони худро аз даст додааст.Ба иттилои манбаъ, теъдоди куштор назар ба ҳамин давраи соли гузашта 50 фоиз афзудааст. Кормандони мақомоти ҳифзи ҳуқуқ дар соли 2008 як гурӯҳи ҷинояткорро бо сардории Шавкат Сафаров, ки дар шаҳри Душанбе ва вилояти Суғд ба ғорати нуқтаҳои мубодилаи асъор машғул буд, дастгир намуданд. Суди Олии Ҷумҳурии Тоҷикистон Шавкат Сафаровро (бо лақаби Шамил) ба ҳабси абад ва аъзои гурӯҳро аз 20 то 30 сол аз озодӣ маҳрум кард. Зарари расонидаи ин гурӯҳи ҷинояткор наздик ба 1 млн. сомонӣ муайян шудааст. Аз соли 2008 то 22 –юми августи соли ҷорӣ қариб 30 нуқтаи мубодилаи асъор ва фурӯшандагони ин нуқтаҳо мавриди ҳамлаи ғоратгарон қарор гирифта буданд. Ба ақидаи коршиносон, барои пешгирии ҷиноятҳо бояд камераҳои видеоӣ дар ҳамаи нуқтаҳои мубодилаи асъор насб карда шаванд, аммо то имрӯз дар ягон нуқтаи мубодилаи асъор аз чунин техника истифода нашудааст.