20 соли Истиқлолият ва мудофиаи гражданӣ

Душанбе, 24 август. (АМИТ «Ховар», Бекназари Абӯбакр). — Имрӯз дар Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бахшида ба 20-солагии Истиқлолияти давлатӣ ҷамъомад баргузор гардид. Дар ин ҷамъомад намояндагони Кумитаи иҷроияи Ҳаракати Ваҳдати миллӣ ва эҳёи Тоҷикистон, Кумитаи ҷавонон, варзиш ва сайёҳӣ ва Шӯрои cобиқадорони Кумитаи ҳолатҳои фавқулодда ва мудофиаи гражданӣ иштирок намуда, роҷеъ ба моҳияти арзишҳои Истиқлолият, оини ватандӯстиву ватандорӣ ва посдории Ваҳдати миллӣ изҳори андеша карданд. Зикр гардид, ки дар даврони соҳибистиқлолии Тоҷикистон дар тамоми соҳаҳо, бахусус дар самти мудофиаи гражданӣ пешравиҳои назаррас ба миён омад, ки самараи Истиқлолият ва Ваҳдат мебошад. Аз ҷумла, дар даврони соҳибистиқлолӣ Кумитаи ҳолатҳои фавқулодда ва мудофиаи гражданӣ таъсис ёфта, бо бинои алоҳида, ҷузъу томҳои низомӣ, таҷҳизоти наву замонавӣ ва шароити мусоиди кор таъмин гардид, ки ин ҳама бевосита ба рафти фаъолияти кормандони соҳа таъсир мегузорад. Маврид ба зикр аст, ки дар ҷузъу томҳои низомии Кумитаи ҳолатҳои фавқулодда ва мудофиаи гражданӣ ба истиқболи ҷашни 20-солагии Истиқлолияти давлатӣ чорабиниҳои васеи фарҳангиву варзишӣ дар назар аст.