Афзоиши маоши кӯҳканон

Душанбе, 16 август. (АМИТ «Ховар», Бекназари Абӯбакр). — Ба муносибати 20–умин солгарди Истиқлолияти давлатии Ҷумҳурии Тоҷикистон моҳонаи кормандон ва кўҳканони корхонаи «Комбинати маъданбарории Адрасмон»-и шаҳри Қайроққум 10 фоиз зиёд гардида, дар арафаи ид, дар ҳаҷми 50 фисади музди маош мукофотпулии яквақта дода мешавад. Дар ин бора ба АМИТ «Ховар аз хадамоти матбуоти раиси вилояти Суғд иттилоъ доданд. Маврид ба зикр аст, ки «Комбинати маъданбарории Адрасмон»-и шаҳри Қайроққум дар шашмоҳаи аввали соли равон иқтидорҳои иловагии корхонаро ба кор дароварда, ба маблағи 25,7 млн. сомонӣ маҳсулоти саноатӣ истеҳсол намуд, ки он нисбат ба ҳамин давраи соли гузашта 113,8 фоиз, ё ин ки ба маблағи 3,1 млн. сомонӣ зиёд мебошад. Ҳамчунин, дар ин давра ба миқдори 2 ҳозору 629 тонна консентрати нуқраю рўҳ истеҳсол гардида, ин раванд рўз то рўз рў ба афзоиш аст.
 
Дар комбинат 645 нафар фаъолият дошта, маоши миёнаи онҳо ба 1 ҳазору 17 сомонӣ баробар аст, ки он нисбат ба ҳамин давраи соли сипаришуда 271 сомонӣ зиёд мебошад.