Амалӣ шудани лоиҳаҳо имконият дорад

Душанбе, 23 август, (АМИТ «Ховар», Лаззат Диловарзод).- Ба гуфти сардори Корхонаи воҳиди давлатии (КВД) «Роҳи оҳани Тоҷикистон» Амонуллои Ҳукуматулло, бо мақсади рушди соҳа якчанд лоиҳаҳои инвеститсионӣ таҳия шудааст. Айни замон дар асоси яке аз ин лоиҳаҳои инвеститсионӣ сохтмони роҳи оҳани Душанбе — Қӯрғонтеппа тавассути бунёди роҳи оҳани Ваҳдат — Ёвон ба масофаи 46 км идома дорад, ки маблағи сохтмонии он 129, 9 млн. доллари амрикоиро ташкил медиҳад.Аҳамияти сохтмони ин роҳ дар он арзёбӣ мешавад, ки масофаи роҳи оҳани Душанбе — Қӯрғонтеппа 4 маротиба кӯтоҳ гардида, ҳамлу нақли бору мусофирон аз ноҳияҳои ҷануби кишвар бидуни убури марзи Ӯзбекистон таъмин мегардад.Ба зами ин, боз ду лоиҳаи инвеститсионӣ; сохтмони роҳи оҳани Колхозобод – Панҷи Поён – Қундуз ба масофаи 121 км, лоиҳаи сохтмони роҳи оҳани Қошғар – Ош, Душанбе — Қарамиқ ба масофаи 296 км ба маблағи 1 млрд. 601 млн. доллари амрикоӣ таҳия шудааст, ки амалӣ шудани онҳо дар рушди иқтисодиёти Тоҷикистон бебаҳо хоҳад буд.