Англия шумораи аскаронашро дар Афғонистон кам карданист

Душанбе, 25 август (АМИТ «Ховар», Пайрав Назаров). – 24 август мулоқоти муовини Вазири корҳои хориҷии Ҷумҳурии Тоҷикистон Низомиддин Зоҳидов бо Ноиби маршали Қувваҳои ҳарбии ҳавоӣ, ёвари Сардори Ситоди генералии Қувваҳои Мусаллаҳи Британияи Кабир Греҳам Ҳовард баргузор шуд.Дар мулоқот Сафири Британияи Кабир дар Тоҷикистон Тревор Мур ва намояндагони Вазорати мудофиаи ин мамлакат низ иштирок доштанд.Дар ҷараёни сӯҳбат вазъи минтақа, нақшаҳои ояндаи ба қувваҳои амниятии Афғонистон супурдани вазифаҳо ва фаъолияти қувваҳои низомии Британияи Кабир баъди соли 2015 мавриди муҳокима қарор гирифтанд. Дар робита бо ин, ҷонибҳо аз рӯи масъалаи дастгирии Қувваҳои байналмилалии мусоидат ба амнияти Афғонистон табодули афкор намуданд.Низомиддин Зоҳидов диққати мусоҳибонро ба зарурати мустаҳкам намудани қувваҳои сарҳадии Афғонистон ба манзури ҷилавгирии хилофи қонун убур намудани сарҳад, коҳиш додани гардиши маводи нашъаовар ва муборизаи зидди гурӯҳҳои террористӣ ҷалб намуд.Дар ин бора ба АМИТ «Ховар» дар Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон иттилоъ доданд.