Армуғони тиббӣ ба ҷашни Истиқлол

Душанбе, 22 август. (АМИТ «Ховар», Бекназари Абӯбакр). Олимони ДДТТ дар арафаи ҷашни 20-солагии Истиқлолияти давлатии Ҷумҳурии Тоҷикистон китоби пурарзиши «Энсиклопедияи мухтасари тиб»-ро ба нашр расониданд, ки дар омодасозии он шумораи зиёди олимон ва устодони варзидаи ин даргоҳи илмӣ фаъолона ширкат варзиданд. Омодасозии ин энсиклопедия моҳи январи соли 2010 оғоз ёфта, мақсад буд, ки он дар 5 ҷилд бо сифати баланд ва дарбаргирии пурраи комёбиҳои навтарини илми тибби муосир омода ва нашр гардад. Бо кўшиши зиёди гурўҳи корӣ, ки беш аз 30 нафар олимони варзидаро дар бар мегирифт, ду ҷилди китоби мазкур ба дасти хонанда расид. Маврид ба зикр аст, ки «Энсиклопедияи мухтасари тиб» барои ба низом даровардани комёбиҳои таърихии олимони тоҷик дар риштаи тиб, дар алоқамандӣ бо дигар шохаҳои илми табиатшиносӣ ва шарҳу эзоҳ додани ин дастовардҳои илмӣ кўшиши аввалин ба ҳисоб меравад. Аз ин рў метавон онро армуғони арзандае ба ҷашни 20-солагии Истиқлолияти давлатии Тоҷикистон ҳисобид.