Ба пешвози 20 — солагии Истиқлолияти давлатӣ

Душанбе, 22 август. (АМИТ «Ховар», Лаззат Диловарзод).- Мақомоти иҷроияи ҳокимияти давлатии ноҳияи Рӯдакӣ дар ҳамдастӣ бо сокинони ноҳия баҳри ободии диёр ва сазовор ҷашн гирифтани 20 – солагии Истиқлолияти давлатӣ корҳои омодагиро торафт суръат мебахшанд,- иброз дошт мудири шӯъбаи рушди иҷтимоӣ ва робита бо ҷомеаи дастгоҳи раиси ноҳия Муҳаммадии Салим ба мухбири АМИТ «Ховар».Ба гуфти М.Салим, дар доираи чорабиниҳо бо ибтикори соҳибкорони ноҳия 12 толори варзишӣ, фабрикаи дорусозӣ (фармасевтӣ) дар деҳоти Чоряккорон ба маблағи 13 млн. сомонӣ барои 150 ҷойи корӣ, маркази тиҷорату хизматрасонӣ дар деҳоти Ҷимтеппа ба маблағи 2 млн. сомонӣ барои 40 ҷойи корӣ, ташхисгоҳи умумии химиявӣ, дорухонаи «Фирдавс», бинои иловагии мактаби таҳсилоти умумии рақами 137, коргоҳи ҳасиббарорӣ дар деҳоти Қӯштеппа, коргоҳи қаннодӣ дар деҳоти «Россия», коргоҳи дӯзандагӣ ва дорухона дар шаҳраки Турсунзода аз ҷумлаи 100 иншоти ҷашнӣ буданд, ки ба истифода дода шудаанд.